កម្មវិធី ASPIRE-AT ខេត្តកណ្ដាល៖

——————-

ក្រុមការងារមន្ទីរកសិកម្ម រុក្ខាប្រមាញ់ និងនេសាទខេត្តកណ្ដាល បានសម្របសម្រួលរៀបចំកម្មវិធីចែករំលែកបទពិសោធន៍ផលិតកម្មបន្លែ ពីកសិករនាំមុខឈ្មោះ នឹម ឯក នៅសហគមន៍កសិកម្មខ្ពបអាទាវ នៅភូមិបឹងកណ្ដាល ឃុំខ្ពបអាទាវ ស្រុកលើកដែក ដែលមានអ្នកចូលរួមសរុប ៣៨នាក់ (ស្រី ២៣នាក់)។ កសិករនាំមុខឈ្មោះ នឹម ឯក បានចូលរួមកន្លងមកក្នុងកម្មវិធីរៀនសូត្រ និងចែករំលែកចំណេះដឹងរវាងកសិករជោគជ័យអំពីផលិតកម្មបន្លែ ពីសហគមន៍កសិកម្មតាសីសាមគ្គី នៅភូមិតាសី ឃុំតាម៉ឺន ស្រុកថ្មគោល ខេត្តបាត់ដំបង ដែលគាំទ្រដោយកម្មវិធី ASPIRE-AT ។

ជាលទ្ធផលសម្រេចបាន៖

–  បានធ្វើបទបង្ហាញអំពីប្រវត្តិនៃដំណើរការរបស់សហគមន៍កសិកម្មតាសីសាមគ្គី ចាប់តាំងពីកកើតរហូតដល់ពេលបច្ចុប្បន្ន ដែលដឹកនាំដោយលោក ណុប នុន រហូតបានជោគជ័យដល់សព្វថ្ងៃនេះ

–  បានអនុវត្តផ្ទាល់លើបច្ចេកទេសផលិតជី EM ថ្នាំបណ្ដេញសត្វល្អិតផ្សំពីរុក្ខជាតិ ជីបំប៉នដំណាំ ការផលិតជីកំប៉ុស្ដិ៍គោក និងការសាបកូនបន្លែក្នុងត្រេ ដើម្បីរួមចំណែកកាត់បន្ថយថ្លៃដើមផលិតបន្លែ ដែលធ្លាប់បានអនុវត្តតាមទម្លាប់កន្លងមក

–  ជាមួយគ្នានេះក្រុមការងារ និងកសិករនាំមុខក៏បានលើកឡើងអំពីឱកាសចាប់យកទីផ្សារតាមរយៈការផលិត កសិផលប្រកបដោយគុណភាព សុវត្ថិភាព ស្របតាមតម្រូវការទីផ្សារ ជូនដល់សមាជិកដែលបានចូលរួម ដើម្បីជំរុញការផលិតឱ្យបានសម្រាប់ការផ្គត់ផ្គង់ទីផ្សារក្នុងស្រុក ក៏ដូចជាក្នុងតំបន់ផងដែរ។