នៅថ្ងៃទី១៩ ខែសីហា ឆ្នាំ២០២៥ ឯកឧត្តមបណ្ឌិត រដ្ឋលេខាធិការ មាស ពិសិដ្ឋ បានដឹកនាំកិច្ចប្រជុំ ស្តីពីការពិនិត្យ និងវាយតម្លៃការអនុវត្តគម្រោងអភិវឌ្ឍន៍ធំៗ នៅទីស្តីការក្រសួងកសិកម្ម រុក្ខាប្រមាញ់ និងនេសាទ ។

កិច្ចប្រជុំនេះត្រូវបានចូលរួមដោយថ្នាក់ដឹកនាំ និងមន្រ្តីក្រសួងកសិកម្ម រុក្ខាប្រមាញ់ និងនេសាទ ដែលជាអ្នកតម្រង់ទិស និងគ្រប់គ្រងគម្រោងអភិវឌ្ឍន៍ សមាជិកអង្គភាពសម្របសម្រួលគម្រោងអភិវឌ្ឍន៍ និងមន្រ្តីលេខាធិការដ្ឋានកម្មវិធីគាំទ្រសេដ្ឋកិច្ចជនបទ និងពាណិជ្ជកម្មផលិតផលកសិកម្ម (ASPIRE-AT) សរុបចំនួន ៧៣ នាក់ ក្នុងនោះ មានស្រ្តី ១២ នាក់ ។

ជាកិច្ចចាប់ផ្តើម ឯកឧត្តមប្រធានអង្គប្រជុំបានស្វាគមន៍អ្នកចូលរួម  ហើយបានបកស្រាយអំពីគោលបំណងនៃកិច្ចប្រជុំ និងអនុសាសន៍   សំខាន់ៗរបស់ ឯកឧត្តមរដ្ឋមន្ត្រី ។ បន្ទាប់មក អង្គប្រជុំបានស្តាប់ការបកស្រាយ និងពិភាក្សាអំពីគម្រោងអភិវឌ្ឍន៍ធំៗចំនួន ១៣ ដោយ ផ្តោតជាសំខាន់លើលទ្ធផល បញ្ហាប្រឈម និងដំណោះស្រាយដែលគួរធ្វើ ដើម្បីបង្កើនប្រសិទ្ធភាព សម្រេចគោលបំណងដែលបានគ្រោង និងរួមចំណែកដោះស្រាយបញ្ហាប្រឈមសំខាន់ៗនៅក្នុងវិស័យ ឱ្យស្របនឹងកម្មវិធីគោលនយោបាយ និងយុទ្ធសាស្ត្រថ្មី ។

នៅទីបំផុត កិច្ចប្រជុំបានសម្រេចដូចតទៅ ៖

• កិច្ចប្រជុំបានសម្រេចលទ្ធផល ដូចដែលបានគ្រោង ពោលគឺ ៖
• អ្នកចូលរួមបានទទួលព័ត៌មាន ចំណេះដឹង និងយោបល់ល្អៗ និងសំខាន់ៗ ជាពិសេស ពីអនុវិស័យផ្សេងៗ
• មន្ត្រី និងទីប្រឹក្សា បានដឹងអំពីកិច្ចការដែលខ្លួនកំពុងរួមចំណែក និងវិធីអនុវត្តឱ្យកាន់តែមានប្រសិទ្ធភាព
• អង្គភាពសម្របសម្រួលគម្រោងបានកត់ត្រា ហើយនឹងសិក្សាបទបង្ហាញថែមទៀត ដើម្បីធ្វើរបាយការណ៍ជូន ឯកឧត្តមរដ្ឋមន្រ្តី
• គម្រោងអភិវឌ្ឍន៍ជាយន្តការដ៏សំខាន់របស់ក្រសួង និងរបស់ជាតិ ដែលត្រូវគ្រប់គ្រង និងអនុវត្តឱ្យកាន់តែមានប្រសិទ្ធភាព
• សកម្មភាព និងវិធីអនុវត្ត ត្រូវតែស្របនឹងតម្រូវការ ឬ សភាពការណ៍ជាក់ស្តែង
• ត្រូវធ្វើឱ្យកសិករ អ្នកទទួលផល និងអ្នកពាក់ព័ន្ធទុកចិត្តថាអ្វីដែលយើងនិយាយ បង្ហាញ និងបញ្ចូល នឹងផ្តល់ផលប្រយោជន៍ជូនគាត់
• ត្រូវធ្វើឱ្យបានប្រាកដថា គម្រោងផ្តល់ភាពចំណេញដល់អ្នកទទួលផល ពោលគឺមាននិរន្តរភាពសេដ្ឋកិច្ច និងនិរន្តរភាពបរិស្ថាន
• ដោយនិតិវិធីលទ្ធកម្មមានភាពស្មុគស្មាញ ហើយតម្រូវឱ្យចំណាយេពេលវេលាច្រើន គួរពិចារណាអនុវត្ត មុនពេលផ្តើមអនុវត្តគម្រោង
• ដើម្បីឱ្យកាន់តែមានប្រយោជន៍សម្រាប់ខ្មែរ ត្រូវប្រែសម្រួលឯកសារជាខ្មែរ ឱ្យបានត្រឹមត្រូវ និងឱ្យងាយយល់ ។